१३१. कुक्कुच्चपकतपन्नरसकं

२२५. इध पन, भिक्खवे, अञ्ञतरस्मिं आवासे तदहु पवारणाय सम्बहुला आवासिका भिक्खू सन्निपतन्ति, पञ्च वा अतिरेका वा. ते जानन्ति ‘‘अत्थञ्ञे आवासिका भिक्खू अनागता’’ति. ते ‘‘कप्पतेव अम्हाकं पवारेतुं, नाम्हाकं न कप्पती’’ति कुक्कुच्चपकता पवारेन्ति. तेहि पवारियमाने अथञ्ञे आवासिका भिक्खू आगच्छन्ति बहुतरा. तेहि, भिक्खवे, भिक्खूहि पुन पवारेतब्बं. पवारितानं आपत्ति दुक्कटस्स.

इध पन, भिक्खवे, अञ्ञतरस्मिं आवासे तदहु पवारणाय सम्बहुला आवासिका भिक्खू सन्निपतन्ति, पञ्च वा अतिरेका वा. ते जानन्ति ‘‘अत्थञ्ञे आवासिका भिक्खू अनागता’’ति. ते ‘‘कप्पतेव अम्हाकं पवारेतुं, नाम्हाकं न कप्पती’’ति कुक्कुच्चपकता पवारेन्ति. तेहि पवारियमाने अथञ्ञे आवासिका भिक्खू आगच्छन्ति समसमा. पवारिता सुप्पवारिता, अवसेसेहि पवारेतब्बं. पवारितानं आपत्ति दुक्कटस्स.

इध पन, भिक्खवे, अञ्ञरस्मिं आवासे तदहु पवारणाय सम्बहुला आवासिका भिक्खू सन्निपतन्ति, पञ्च वा अतिरेका वा. ते जानन्ति ‘‘अत्थञ्ञे आवासिका भिक्खू अनागता’’ति. ते ‘‘कप्पतेव अम्हाकं पवारेतुं, नाम्हाकं न कप्पती’’ति कुक्कुच्चपकता पवारेन्ति. तेहि पवारियमाने अथञ्ञे आवासिका भिक्खू आगच्छन्ति थोकतरा. पवारिता सुप्पवारिता, अवसेसेहि [अवसेसेहि तेसं सन्तिके (क.)] पवारेतब्बं. पवारितानं आपत्ति दुक्कटस्स.

इध पन, भिक्खवे, अञ्ञतरस्मिं आवासे तदहु पवारणाय सम्बहुला आवासिका भिक्खू सन्निपतन्ति, पञ्च वा अतिरेका वा. ते जानन्ति ‘‘अत्थञ्ञे आवासिका भिक्खू अनागता’’ति. ते ‘‘कप्पतेव अम्हाकं पवारेतुं, नाम्हाकं न कप्पती’’ति कुक्कुच्चपकता पवारेन्ति. तेहि पवारितमत्ते,…पे… अवुट्ठिताय परिसाय…पे… एकच्चाय वुट्ठिताय परिसाय…पे… सब्बाय वुट्ठिताय परिसाय, अथञ्ञे आवासिका भिक्खू आगच्छन्ति बहुतरा…पे… समसमा…पे… थोकतरा. पवारिता सुप्पवारिता, तेसं सन्तिके पवारेतब्बं. पवारितानं आपत्ति दुक्कटस्स.

कुक्कुच्चपकतपन्नरसकं निट्ठितं.