११५. वजादीसु वस्सूपगमनं

२०३. तेन खो पन समयेन अञ्ञतरो भिक्खु वजे वस्सं उपगन्तुकामो होति. भगवतो एतमत्थं आरोचेसुं. अनुजानामि, भिक्खवे, वजे वस्सं उपगन्तुन्ति. वजो वुट्ठासि. भगवतो एतमत्थं आरोचेसुं. अनुजानामि, भिक्खवे, येन वजो तेन गन्तुन्ति.

तेन खो पन समयेन अञ्ञतरो भिक्खु उपकट्ठाय वस्सूपनायिकाय सत्थेन गन्तुकामो होति. भगवतो एतमत्थं आरोचेसुं. अनुजानामि, भिक्खवे, सत्थे वस्सं उपगन्तुन्ति.

तेन खो पन समयेन अञ्ञतरो भिक्खु उपकट्ठाय वस्सूपनायिकाय नावाय गन्तुकामो होति. भगवतो एतमत्थं आरोचेसुं. अनुजानामि, भिक्खवे, नावाय वस्सं उपगन्तुन्ति.

वजादीसु वस्सूपगमनं निट्ठितं.