२. अन्धकारवग्गवण्णना

८४१. अन्धकारवग्गस्स पठमे दाने वा पूजाय वाति दाननिमित्तं वा पूजानिमित्तं वा. मन्तेतीति कथेति. रत्तन्धकारता, पुरिसस्स हत्थपासे ठानं वा सल्लपनं वा, सहायाभावो, रहोपेक्खताति इमानि पनेत्थ चत्तारि अङ्गानि.

८४२-८४६. दुतियततियचतुत्थानि उत्तानत्थानेव.

८५६-८५७. पञ्चमे अनोवस्सकं अतिक्कामेन्तियाति छन्नस्स अन्तो निसीदित्वा पक्कमन्तिं सन्धाय वुत्तं. ‘‘उपचारो द्वादसहत्थो’’ति वदन्ति. पल्लङ्कस्स अनोकासेति ऊरुबद्धासनस्स अनोकासे अप्पहोन्ते. पुरेभत्तता, अन्तरघरे निसज्जा, आसनस्स पल्लङ्कोकासता, अञ्ञत्र अनुञ्ञातकारणा अनापुच्छनं, वुत्तपरिच्छेदातिक्कमोति इमानि पनेत्थ पञ्च अङ्गानि.

८५९-८६४. छट्ठसत्तमादीनि उत्तानत्थानेव.

अन्धकारवग्गवण्णना निट्ठिता.