३. खम्भकतवग्गवण्णना

६०३. पत्ते गहणसञ्ञा अस्स अत्थीति पत्तसञ्ञीति इममत्थं दस्सेतुं ‘‘पत्ते सञ्ञं कत्वा’’ति वुत्तं.

६०४. ओलोणीति एका ब्यञ्जनविकति. कञ्जिकतक्कादिरसोति केचि. मंसरसादीनीति आदि-सद्देन अवसेसा सब्बापि ब्यञ्जनविकति सङ्गहिता.

६०५. समभरितन्ति रचितं. हेट्ठा ओरोहतीति समन्ता ओकाससम्भवतो हत्थेन समं करियमानं हेट्ठा भस्सति. पत्तमत्थके ठपितानि पूवानि एव वटंसकाकारेन ठपितत्ता ‘‘पूववटंसक’’न्ति वुत्तानि. केचि पन ‘‘पत्तं गहेत्वा थूपीकतं पिण्डपातं रचित्वा दिय्यमानमेव गण्हतो आपत्ति, हत्थगते एव पन पत्ते दिय्यमाने थूपीकतम्पि गहेतुं वट्टती’’ति वदन्ति, तं न गहेतब्बमेव ‘‘समतित्तिक’’न्ति भावनपुंसकवसेन सामञ्ञतो वुत्तत्ता.

खम्भकतवग्गवण्णना निट्ठिता.