७. दुच्चरितसुत्तवण्णना

४१३. एत्थापि मनोसुचरितं सीलं नामाति दस्सेतीति कत्वा वुत्तं ‘‘पच्छिमापि तयो’’ति. अनभिज्झाअब्यापादसम्मादिट्ठिधम्मा सीलं होतीति वेदितब्बा कायवचीसुचरितेहि सद्धिं मनोसुचरितम्पि वत्वा ‘‘ततो त्वं भिक्खु सीलं निस्साय सीले पतिट्ठाया’’ति वुत्तत्ता. सेसं वुत्तनयमेव. छट्ठसत्तमेसूति छट्ठसत्तमवग्गेसु अपुब्बं नत्थि. तेन वुत्तं ‘‘हेट्ठा वुत्तनयेनेव अत्थो वेदितब्बो’’ति. वग्गपेय्यालतो पन इमस्मिं सतिपट्ठानसंयुत्ते कतिपयवग्गा सङ्गहं आरूळ्हा, तथापि तेसं अत्थविसेसाभावतो एकच्चेसु पोत्थकेसु मुखमत्तं दस्सेत्वा संखित्ता, एकच्चेसु अतिसंखित्ताव, ते सङ्खेपवसेन द्वे कत्वा ‘‘छट्ठसत्तमेसू’’ति वुत्तं.

अमतवग्गवण्णना निट्ठिता.

सतिपट्ठानसंयुत्तवण्णना निट्ठिता.