४. अननुस्सुतवग्गवण्णना

३९७-४०७. या वेदना सम्मसित्वाति या तेभूमकवेदना सम्मसित्वा. तावस्साति ता तेभूमकवेदना एव अस्स भिक्खुनो. सदिसवसेन चेतं वुत्तं, अनिच्चादिसम्मसनवसेन विदिता पुब्बभागे सम्मसनकाले उपट्ठहन्ति. परिग्गहितेसूति परिजाननवसेन परिच्छिज्ज गहितेसु. ‘‘वेदना तण्हापपञ्चस्स, वितक्को मानपपञ्चस्स, सञ्ञा दिट्ठिपपञ्चस्स मूलवसेन सम्मसनं वुत्ता’’ति वदन्ति. ‘‘वेदनावितक्कसञ्ञा तण्हामानदिट्ठिपपञ्चानं मूलदस्सनवसेना’’ति अपरे.

अननुस्सुतवग्गवण्णना निट्ठिता.