६. सूरियपेय्यालवग्गवण्णना

४९-६२. यथा अरुणुग्गं सूरियुग्गमनस्स एकन्तिकं पुब्बनिमित्तं, एवं कल्याणमित्तता अरियमग्गपातुभावस्साति सदिसूपमा अरुणुग्गं कल्याणमित्तताय. कल्याणमित्तोति चेत्थ अरियो, अरियमग्गो वा दट्ठब्बो सूरियपातुभावो विय तेन विधूपनीयन्धकारविधमनतो. कुसलकत्तुकम्यताछन्दो छन्दसम्पदा इतरछन्दतो सम्पन्नत्ता. कारापकअप्पमादस्साति सच्चपटिवेधस्स कारापकस्स. एवं सब्बत्थेव सम्पदासद्दा विसेसाधिगमहेतुताय वेदितब्बा. अञ्ञेनपि आकारेनाति ‘‘विवेकनिस्सित’’न्तिआदिआकारतो अञ्ञेन ‘‘रागविनयपरियोसान’’न्तिआदिना आकारेन.

सूरियपेय्यालवग्गवण्णना निट्ठिता.