११. भद्रकसुत्तवण्णना

३६३. एवंनामकेति मल्ला नाम जानपदिनो राजकुमारा, नेसं निवासताय ‘‘मल्ला’’इच्चेव बहुवचनवसेन लद्धनामत्ता एवंनामके जनपदे. नत्थि एतस्स पत्तिया कालन्तरसञ्ञितो कालोति अकालो, सो एव अकालिको. तेनाह – ‘‘कालं अनतिक्कमित्वा पत्तेना’’ति. सो पन ‘‘यंकिञ्चि दुक्खं उप्पज्जमानं उप्पज्जति, सब्बं तं छन्दमूलक’’न्ति एवं वुत्तो दुक्खस्स छन्दमूलभावो, एवं छन्दमूलकस्स दुक्खस्स कथितत्ता ‘‘इमस्मिं सुत्ते वट्टदुक्खं कथित’’न्ति वुत्तं.

भद्रकसुत्तवण्णना निट्ठिता.