१०. सगाथकसुत्तवण्णना

१६६. ‘‘यस्स सक्करियमानस्सा’’ति एत्थ असक्कारेन चूभयन्ति असक्कारेन च उभयञ्च, कदाचि सक्कारेन, कदाचि असक्कारेन कदाचि उभयेनाति अत्थो. तेनाह ‘‘असक्कारेना’’तिआदि. सततविहारानं सम्पत्तिया साततिकोति आह ‘‘अरहत्त…पे… सुखुमदिट्ठी’’तिआदि. तथा हि सा ‘‘वजिरूपमञाण’’न्ति वुच्चति. आगतत्ताति फलसमापत्तिं समापज्जितुं तस्सा पुब्बपरिकम्मं उपगतत्ता.

सगाथकसुत्तवण्णना निट्ठिता.

पठमवग्गवण्णना निट्ठिता.