१०. मोग्गल्लानसुत्तवण्णना

२१८. पच्चवेक्खतीति तेसं अरियानं चित्तं अत्तनो ञाणचक्खुना पति अवेक्खति पच्चवेक्खति. पब्बतस्साति इसिगिलिपब्बतस्स. दुक्खपारं गतन्ति वट्टदुक्खस्स पारं परियन्तं गतं. सब्बगुणसम्पन्नन्ति सब्बेहि बुद्धगुणेहि च सावकगुणेहि च परिपुण्णं. अनेकाकारसम्पन्नन्ति रूपघोसलूखधम्मप्पमाणिकानं सत्तानं तेहि तेहि आकारेहि सब्बेसञ्च अनेकेहि अनन्तापरिमेय्येहि पसीदितब्बाकारेहि समन्नागतं. ते पन आकारा यस्मा अनञ्ञसाधारणा बुद्धगुणा एव, तस्मा आह ‘‘अनेकेहि गुणेहि समन्नागत’’न्ति.

मोग्गल्लानसुत्तवण्णना निट्ठिता.