९. नवमसिक्खापदं

८७५. नवमे अभिसपेय्याति एत्थ सपधातुस्स अक्कोसनत्थं अन्तोकत्वा करधातुया अत्थं दस्सेन्तो आह ‘‘सपथं करेय्या’’ति. निरये निब्बत्ताम्हीति अहं निरये निब्बत्ता अम्हीति योजना. निरये निब्बत्ततूति एसा भिक्खुनी निरये निब्बत्ततूति योजना. ईदिसा होतूति मम सदिसा होतूति अत्थो. काणाति एकक्खिकाणा, द्वक्खिकाणा वा. कुणीति हत्थपादादिवङ्का.

८७८. एदिसाति विरूपादिजातिका. विरमस्सूति विरमाहि. अद्धाति धुवन्ति. नवमं.