११. एकादसमसिक्खापदं

११६७. एकादसमे तत्थाति ‘‘पारिवासियछन्ददानेना’’ति वचने. अञ्ञत्राति अञ्ञं ठानं.

एकं अज्झेसन्तीति एकं भिक्खुं धम्मकथनत्थाय निय्योजेन्ति. अञ्ञं पनाति उपोसथिकतो अञ्ञं पन.

तत्राति तेसु भिक्खूसु. सुभासुभं नक्खत्तं पठतीति नक्खत्तपाठको. दारुणन्ति कक्खळं. तेति भिक्खू. तस्साति नक्खत्तपाठकस्स भिक्खुस्स. ‘‘नक्खत्तं पटिमानेन्तं, अत्थो बालं उपच्चगा’’तिजातकपाळि (जा. १.१.४९). अयं पनेत्थ योजना – नक्खत्तं पटिमानेन्तं बालं अत्थो हितं उपच्चगा उपसमीपे अतिक्कमित्वा अगाति. एकादसमं.