६. आरामवग्गो

१. पठमसिक्खापद-अत्थयोजना

१०२५. आरामवग्गस्स पठमे उपचारन्ति अपरिक्खित्तस्स आरामस्स परिक्खेपारहट्ठानं उपचारं.

१०२७. ‘‘सीसानुलोकिका’’ति सामञ्ञतो वुत्तेपि भिक्खुनीनमेव सीसन्ति आह ‘‘भिक्खुनीन’’न्ति. यत्थाति यस्मिं ठानेति. पठमं.

२. दुतियसिक्खापदं

१०२८. दुतिये अब्भन्तरोति अब्भन्तरे परियापन्नो, जातो वा. ‘‘सङ्कामेसी’’ति इमिना संहरीति एत्थ हरधातुया सङ्कमनत्थं दस्सेति. न्हापिताति कप्पका. ते हि नहापेन्ति सोचापेन्तीति न्हापिताति वुच्चन्ति. तन्ति कासावनिवासनन्ति. दुतियं.

३-४. ततिय-चतुत्थसिक्खापदं

१०३६. ततियचतुत्थेसु अनुत्तानट्ठानं नत्थीति. ततियचतुत्थानि.

५. पञ्चमसिक्खापदं

१०४३. पञ्चमे ‘‘कुले मच्छरो’’ति एत्थ मच्छरनं मच्छरोति वचनत्थो कातब्बो. ‘‘तं कुलं अस्सद्धं अप्पसन्न’’न्ति कुलस्स अवण्णं भासतीति योजना. ‘‘भिक्खुनियो दुस्सीला पापधम्मा’’ति भिक्खुनीनं अवण्णं भासतीति योजना.

१०४५. ‘‘सन्तंयेव आदीनव’’न्ति सम्बन्धिया सम्बन्धं दस्सेतुं वुत्तं ‘‘कुलस्स वा भिक्खुनीनं वा’’ति इमिना द्वीसु अञ्ञतरमेव न सम्बन्धो होति, अथ खो द्वयम्पीति दस्सेतीति. पञ्चमं.

६. छट्ठसिक्खापदं

१०४८. छट्ठे ओवादायाति एत्थ न यो वा सो वा ओवादो होति, अथ खो गरुधम्मोयेवाति आह ‘‘गरुधम्मत्थाया’’ति. सह वसति एत्थ, एतेनाति वा संवासोति वचनत्थेन उपोसथपवारणा संवासो नामाति आह ‘‘उपोसथपवारणापुच्छनत्थाया’’ति. ‘‘पुच्छनत्थाया’’ति इमिना ‘‘संवासाया’’ति एत्थ उत्तरपदलोपभावं दस्सेति. एत्थाति भिक्खुनिविभङ्गे, सिक्खापदे वा पाळियं वाति. छट्ठं.

७-९. सत्तम-अट्ठम-नवमसिक्खापदं

१०५३. सत्तमट्ठमनवमेसु अनुत्तानवचनं नत्थि. केवलं पन ‘‘इमिस्सापी’’ति पदं विसेसो, इमिस्सापि पाळियाति अत्थोति. सत्तमट्ठमनवमानि.

१०. दसमसिक्खापदं

१०६२. दसमे द्वे काया उपरिमकायो हेट्ठिमकायोति. तत्थ कटितो उद्धं उपरिमकायो, हेट्ठा हेट्ठिमकायो. तत्थ ‘‘पसाखे’’ति इदं हेट्ठिमकायस्स नामन्ति आह ‘‘अधोकाये’’ति. हीति सच्चं. ततोति अधोकायतो. इमिना पञ्चमीबाहिरत्थसमासं दस्सेति. रुक्खस्स साखा पभिज्जित्वा गता विय उभो ऊरू पभिज्जित्वा गताति योजना.

१०६५. फालेहीति एत्थ इतिसद्दो आद्यत्थो. तेन ‘‘धोवा’’तिआदीनि चत्तारि पदानि सङ्गण्हाति. आणत्तिदुक्कटानीति हेट्ठा वुत्तेसु अट्ठसु दुक्कटेसु विनयदुक्कटमेव. सेसेसूति भिन्दनतो सेसेसु फालनादीसूति. दसमं.

आरामवग्गो छट्ठो.