४. चतुत्थपाटिदेसनीयसिक्खापदवण्णना

आरामे वा आरामूपचारे वा पटिग्गहेत्वा अज्झोहरन्तस्साति आरामे वा आरामूपचारे वा पटिग्गहेत्वा आरामे वा आरामूपचारे वा अज्झोहरन्तस्साति अत्थो.

बहारामे पटिग्गहितं अज्झारामे भुञ्जन्तस्स अनापत्ति. अङ्गेसु च ‘‘अज्झारामे वा आरामूपचारे वा पटिग्गहण’’न्ति गहेतब्बं. अज्झारामे हि दस्सिते आरामूपचारं दस्सितमेवाति. ‘‘समुट्ठानादीनि कथिनसदिसानि, इदं पन किरियाकिरिय’’न्ति पाठो.

चतुत्थपाटिदेसनीयसिक्खापदवण्णना निट्ठिता.

पाटिदेसनीयवण्णना निट्ठिता.