३. भेसज्जसिक्खापदवण्णना

‘‘पटिसायनीयानि पटिग्गहेत्वा’’ति वदन्तेन पादमक्खनादीनं अत्थाय पटिग्गहेत्वा ठपेतुं वट्टतीति दीपितन्ति लिखितं. ‘‘येसं मंसं कप्पती’’ति वचनेन येसं मंसं न कप्पति, तेसं सप्पिआदि न कप्पतीति वदन्ता अजानित्वा वदन्ति. येसञ्हि मंसं कप्पति, तेसं सप्पीतिआदि सत्ताहकालिकनिस्सग्गियवत्थुपरिच्छेददस्सनत्थं वुत्तं. तथा पणीतभोजनसिक्खापदे येसं मंसं कप्पति, तेसंयेव खीरादि पणीतभोजनं, नेतरन्ति दस्सेतुं वुत्तन्ति. मधु नाम मधुकरिभमरमक्खिकानं आसयेसु निय्याससदिसं महामधु होति, तं यावजीविकन्ति च लिखितं.

भेसज्जसिक्खापदवण्णना निट्ठिता.

पत्तवग्गो ततियो.

निस्सग्गियपाचित्तियवण्णना निट्ठिता.