५. अनापुच्छापक्कमनसिक्खापदवण्णना

आसीदन्ति एत्थाति आसनन्ति आह ‘‘पल्लङ्कस्सोकासभूते’’ति, ऊरुबद्धासनस्स ओकासेति अत्थो. अनोवस्सकन्ति निब्बकोकासं. अज्झोकासे उपचारन्ति अज्झोकासे निसीदित्वा द्वादसहत्थप्पमाणं पदेसं. गिलानायाति या तादिसेन गेलञ्ञेन आपुच्छितुं न सक्कोति. आपदासूति घरे अग्गि वा उट्ठितो होति, चोरो वा, एवरूपे उपद्दवे अनापुच्छा पक्कमति, अनापत्ति.

अनापुच्छापक्कमनसिक्खापदवण्णना निट्ठिता.