३-४. सुप्पटिच्छन्नसिक्खापदवण्णना

सुट्ठु पटिच्छन्नोति जत्तुम्पि उरम्पि अविवरित्वा पटिच्छादेतब्बट्ठाने पटिच्छादनेन पटिच्छन्नो, न सीसपारुतो. तेनाह ‘‘गण्ठिकं पटिमुञ्चित्वा’’तिआदि. तत्थ गण्ठिकं पटिमुञ्चित्वाति गण्ठिकं पासके पटिमुञ्चित्वा. अन्तरघरे वाति गोचरगामे. एकदिवसम्पि वासूपगतस्स सन्तिकं यथासुखं गन्तुं वट्टति, को पन वादो चतुप्पञ्चाहं वासमधिट्ठाय वसितभिक्खूनं सन्तिकन्ति गण्ठिपदे लिखितं.

वासूपगतस्साति रत्तिवासत्थाय उपगतस्स रत्तिभागे वा दिवसभागे वा कायं विवरित्वा निसीदतो अनापत्ति.

सुप्पटिच्छन्नसिक्खापदवण्णना निट्ठिता.