४. वस्सिकसाटिकसिक्खापदवण्णना

चतुत्थे मासो सेसो गिम्हानन्ति चतुन्नं गिम्हमासानं एको पच्छिममासो सेसो. परियेसितब्बन्ति गिम्हानं पच्छिममासस्स पठमदिवसतो पट्ठाय याव कत्तिकमासस्स पच्छिमदिवसो, ताव ‘‘कालो वस्सिकसाटिकाया’’तिआदिना सतुप्पादकरणेन, सङ्घस्स पवारितट्ठानतो, अत्तनो ञातकप्पवारितट्ठानतो पन ‘‘देथ मे वस्सिकसाटिकचीवर’’न्तिआदिकाय विञ्ञत्तियापि परियेसितब्बं. अञ्ञातकअप्पवारितट्ठाने सतुप्पादं करोन्तस्स वत्तभेदे दुक्कटं, यथा वा तथा वा ‘‘देथ मे’’तिआदिवचनेन विञ्ञापेन्तस्स अञ्ञातकविञ्ञत्तिसिक्खापदेन निस्सग्गियं पाचित्तियं. कत्वा निवासेतब्बन्ति गिम्हानं पच्छिमद्धमासस्स पठमदिवसतो पट्ठाय याव कत्तिकमासस्स पच्छिमदिवसो, ताव सूचिकम्मनिट्ठानेन सकिम्पि वण्णभेदमत्तरजनेन कप्पबिन्दुकरणेन च कत्वा परिदहितब्बा. एत्तावता गिम्हानं पच्छिमो मासो परियेसनक्खेत्तं, पच्छिमो अद्धमासो करणनिवासनक्खेत्तम्पि, वस्सानस्स चतूसु मासेसु सब्बम्पि तं वट्टतीति अयमत्थो दस्सितो होति. यो चायं गिम्हानं पच्छिमो मासो अनुञ्ञातो, एत्थ कतपरियेसितम्पि वस्सिकसाटिकं अधिट्ठातुं न वट्टति. सचे तस्मिं मासे अतिक्कन्ते वस्सं उक्कड्ढियति, पुन मासपरिहारं लभति, धोवित्वा पन निक्खिपित्वा वस्सूपनायिकदिवसे अधिट्ठातब्बा. सचे सतिसम्मोसेन वा अप्पहोनकभावेन वा अकता होति. ते च द्वे मासे वस्सानस्स चतुमासन्ति छ मासे परिहारं लभति. सचे पन कत्तिकमासे कथिनं अत्थरियति, अपरेपि चत्तारो मासे लभति, एवं दस मासा होन्ति. ततो परम्पि सतिया पच्चासाय तं मूलचीवरं कत्वा ठपेन्तस्स एकमासन्ति एवं एकादस मासे परिहारं लभति, इतो परं एकाहम्पि न लभति.

ओरेन चे मासो सेसो गिम्हानन्ति गिम्हानं पच्छिममासस्स ओरिमभागे याव हेमन्तस्स पठमदिवसो, तावाति अत्थो. परियेसेय्याति एतेसु सत्तसु पिट्ठिसमयमासेसु अञ्ञातकअप्पवारितट्ठानतो सतुप्पादकरणेन परियेसन्तस्स निस्सग्गियं पाचित्तियं, विञ्ञापेन्तस्स अञ्ञातकविञ्ञत्तिसिक्खापदेन निस्सग्गियं पाचित्तियं, ञातकप्पवारिते विञ्ञापेन्तस्स तेन सिक्खापदेन अनापत्ति, सतुप्पादं करोन्तस्स इमिना सिक्खापदेन आपत्ति. ओरेनद्धमासो सेसो गिम्हानन्ति गिम्हानस्स पच्छिमद्धमासतो ओरिमभागे एकस्मिं अद्धमासे. कत्वा निवासेय्याति एत्थन्तरे धम्मेन उप्पन्नम्पि कत्वा निवासेन्तस्स निस्सग्गियं होति.

सावत्थियं छब्बग्गिये भिक्खू आरब्भ वस्सिकसाटिकपरियेसनवत्थुस्मिं पञ्ञत्तं, असाधारणपञ्ञत्ति, अनाणत्तिकं, तिकपाचित्तियं, ऊनकमासद्धमासेसु अतिरेकसञ्ञिनो वेमतिकस्स वा दुक्कटं, तथा सतिया वस्सिकसाटिकाय नग्गस्स कायं ओवस्सापयतो. पोक्खरणियादीसु पन न्हायन्तस्स वा अच्छिन्नचीवरस्स वा नट्ठचीवरस्स वा ‘‘अनिवत्थं चोरा हरन्ती’’ति एवं आपदासु वा निवासयतो उम्मत्तकादीनञ्च अनापत्ति. एत्थ च वस्सिकसाटिकाय अत्तुद्देसिकता, असमये परियेसनता, ताय च पटिलाभोति इमानि ताव परियेसनापत्तिया तीणि अङ्गानि. सचीवरता, आपदाभावो, वस्सिकसाटिकाय सकभावो, असमये निवासनन्ति इमानि निवासनापत्तिया चत्तारि अङ्गानि. समुट्ठानादीनि धोवापनसिक्खापदे वुत्तनयानेवाति.

वस्सिकसाटिकसिक्खापदवण्णना निट्ठिता.