८. जातरूपसिक्खापदवण्णना

अट्ठमे जातरूपरजतन्ति सुवण्णञ्चेव रूपियञ्च, अपिच कहापणो लोहमासकदारुमासकजतुमासकादयोपि ये वोहारं गच्छन्ति, सब्बे ते इध रजतन्त्वेव वुत्ता. उग्गण्हेय्य वाति अत्तनो अत्थाय दिय्यमानं वा यत्थकत्थचि ठितं वा निप्परिग्गहितं दिस्वा सयं गण्हेय्य वा. उग्गण्हापेय्य वाति तदेव अञ्ञेन गाहापेय्य वा. उपनिक्खित्तं वा सादियेय्याति ‘‘इदं अय्यस्स होतू’’ति एवं सम्मुखा वा, ‘‘असुकस्मिं नाम ठाने मम हिरञ्ञसुवण्णं, तं तुय्हं होतू’’ति एवं परम्मुखा ठितं वा केवलं वाचाय वा हत्थमुद्दाय वा ‘‘तुय्ह’’न्ति वत्वा परिच्चत्तं यो कायवाचाहि अप्पटिक्खिपित्वा चित्तेन अधिवासेय्य, अयं ‘‘सादियेय्या’’ति वुच्चति. सचे पन चित्तेन सादियति, गण्हितुकामो होति, कायेन वा वाचाय वा ‘‘नयिदं कप्पती’’ति पटिक्खिपति, कायवाचाहि अप्पटिक्खिपित्वा सुद्धचित्तो हुत्वा ‘‘नयिदं अम्हाकं कप्पती’’ति न सादियति, वट्टति. निस्सग्गियन्ति उग्गहणादीसु यंकिञ्चि करोन्तस्स अघनबद्धेसु वत्थूसु वत्थुगणनाय निस्सग्गियं पाचित्तियं. तं निस्सज्जन्तेन ‘‘अहं, भन्ते, रूपियं पटिग्गहेसिं, इदं मे, भन्ते, निस्सग्गियं, इमाहं सङ्घस्स निस्सज्जामी’’ति (पारा. ५८४) एवं सङ्घमज्झेयेव निस्सज्जितब्बं. सचे तत्थ कोचि गहट्ठो आगच्छति, ‘‘इदं जानाही’’ति वत्तब्बो. ‘‘इमिना किं आहरिय्यतू’’ति भणन्ते पन ‘‘इदं नामा’’ति अवत्वा ‘‘सप्पिआदीनि भिक्खूनं कप्पन्ती’’ति एवं कप्पियं आचिक्खितब्बं. सचे सो आहरति, रूपियप्पटिग्गाहकं ठपेत्वा सब्बेहि भाजेत्वा परिभुञ्जितब्बं. रूपियप्पटिग्गाहकस्स पन यं तप्पच्चया उप्पन्नं, तं अञ्ञेन लभित्वा दिय्यमानम्पि अन्तमसो ततो निब्बत्तरुक्खच्छायापि परिभुञ्जितुं न वट्टति. सचे पन सो किञ्चि आहरितुं न इच्छति, ‘‘इमं छट्टेही’’ति वत्तब्बो. सचे यत्थ कत्थचि निक्खिपति, गहेत्वा वा गच्छति, न वारेतब्बो. नो चे छट्टेति, पञ्चङ्गसमन्नागतो भिक्खु रूपियछट्टको सम्मन्नितब्बो. तेन अनिमित्तं कत्वाव गूथं विय छट्टेतब्बं. सचे निमित्तं करोति, दुक्कटं आपज्जति.

राजगहे उपनन्दं आरब्भ रूपियप्पटिग्गहणवत्थुस्मिं पञ्ञत्तं, साधारणपञ्ञत्ति, साणत्तिकं, तिकपाचित्तियं, अरूपिये रूपियसञ्ञिनो वेमतिकस्स वा, सङ्घचेतियादीनं अत्थाय गण्हन्तस्स, मुत्तामणिआदिप्पटिग्गहणे च दुक्कटं. रतनसिक्खापदनयेन निक्खिपन्तस्स, उम्मत्तकादीनञ्च अनापत्ति. जातरूपरजतभावो, अत्तुद्देसिकता, गहणादीसु अञ्ञतरभावोति इमानेत्थ तीणि अङ्गानि. समुट्ठानादीसु सिया किरियं गहणेन आपज्जनतो, सिया अकिरियं पटिक्खेपस्स अकरणतो, सेसं सञ्चरित्ते वुत्तनयमेवाति.

जातरूपसिक्खापदवण्णना निट्ठिता.