५. अञ्ञचेतापनसिक्खापदवण्णना

पञ्चमे अञ्ञं चेतापेत्वाति अत्तनो कप्पियभण्डेन ‘‘इदं नाम आहरा’’ति अञ्ञं परिवत्तापेत्वा. अञ्ञं चेतापेय्याति ‘‘एवं मे इदं दत्वा अञ्ञम्पि आहरिस्सती’’ति मञ्ञमाना ‘‘न मे इमिना अत्थो, इदं नाम मे आहरा’’ति ततो अञ्ञं चेतापेय्य. तस्सा चेतापनप्पयोगे दुक्कटं, पटिलाभेन तेन वा अञ्ञेन वा मूलेन आहटं निस्सग्गियं होति, सेसं चतुत्थसदिसमेवाति.

अञ्ञचेतापनसिक्खापदवण्णना निट्ठिता.