५६. ससित्थकसिक्खापदवण्णना

तिंसतिमे ‘‘उद्धरित्वा वा भिन्दित्वा वा पटिग्गहे वा नीहरित्वा वा छड्डेती’’ति इदं अनापत्तियं अधिकं. तत्थ उद्धरित्वा वाति सित्थानि उदकतो उद्धरित्वा, एकस्मिं ठाने रासिं कत्वा उदकं छड्डेति. भिन्दित्वा वाति सित्थानि भिन्दित्वा उदकगतिकानि कत्वा छड्डेति. पटिग्गहे वाति पटिग्गहेन पटिच्छन्तानं पटिग्गहे छड्डेति. नीहरित्वाति बहि नीहरित्वा छड्डेति, एवं छड्डेन्तस्स अनापत्ति.

तिंसभोजनप्पटिसंयुत्तसिक्खापदवण्णना निट्ठिता.