५२…पे…५४. हत्थनिल्लेहकादिसिक्खापदवण्णना

छब्बीसतिमे हत्थनिल्लेहकन्ति हत्थं निल्लेहित्वा निल्लेहित्वा. भुञ्जन्तेन हि अङ्गुलिमत्तम्पि निल्लेहितुं न वट्टति. घनयागुफाणितपायासादिके पन अङ्गुलीहि गहेत्वा अङ्गुलियो मुखे पवेसेत्वा भुञ्जितुं वट्टति, सत्तवीसतिमअट्ठवीसतिमेसुपि एसेव नयो. तस्मा एकङ्गुलियापि पत्तो न निल्लेहितब्बो, एकओट्ठोपि च जिव्हाय न निल्लेहितब्बो, ओट्ठमंसेहि एव पन गहेत्वा अन्तो पवेसेतुं वट्टति.