३-४. सुप्पटिच्छन्नसिक्खापदवण्णना

ततिये सुप्पटिच्छन्नोति सुट्ठु पटिच्छन्नो, गण्ठिकं पटिमुञ्चित्वा अनुवातन्तेन गीवं पटिच्छादेत्वा उभो कण्णे समं कत्वा पटिसङ्घरित्वा याव मणिबन्धं पटिच्छादेत्वा अन्तरघरे गमिस्सामीति अत्थो, तथा अकत्वा पन जाणुं वा उरं वा विवरित्वा गच्छन्तस्स दुक्कटं.

चतुत्थे गलवाटकतो पट्ठाय सीसं, मणिबन्धतो पट्ठाय हत्थे, पिण्डिकमंसतो पट्ठाय पादे विवरित्वा सेसं छादेत्वा निसिन्नो सुप्पटिच्छन्नो नाम होति, एत्थ पन वासूपगतस्स अनापत्ति.