नअत्तपञ्ञत्तिवण्णना

११९. आरद्धविपस्सकोपीति सम्परायिकविपस्सकोपि, तेन बलवविपस्सनाय ठितं पुग्गलं दस्सेति. न पञ्ञपेति एव अबहुस्सुतो पीति अधिप्पायो. तादिसो हि विपस्सनाय आनुभावो. सासनिकोपि झानाभिञ्ञालाभी ‘‘न पञ्ञपेती’’ति न वत्तब्बोति सो इध न उद्धटो. इदानि नेसं अपञ्ञापने कारणं दस्सेति ‘‘एतेसञ्ही’’तिआदिना. इच्चेव ञाणं होति, न विपरीतग्गाहो तस्स कारणस्स दूरसमुस्सारितत्ता. अरूपक्खन्धा इच्चेव ञाणं होतीति योजना.