५. पञ्चकनिद्देसवण्णना

९४०. आगमनस्स पटिसन्धिग्गहणवसेनाति अधिप्पायो.

९४१. उपचयनतोति वड्ढनतो. अञ्ञथाति लाभतो तक्कनतो च अञ्ञप्पकारो गहितोति तं दस्सेन्तो ‘‘सद्धारुचिआदीही’’ति आह. अनुस्सवतो हि सद्दहनं, रुच्चनं पन जातिस्सरञाणतोपि होति. आदि-सद्देन खन्तिआदीनं सङ्गहो.

९४२. अक्खन्ति मूलं एतेसन्ति अक्खन्तिमूलका. दुक्कटदुब्भासिततादिदोसा तादिसानि कायवचीमनोदुच्चरितानि.

९४३. उदग्गतासङ्खातो अवूपसमो न उद्धच्चसङ्खातोति पीतिया एव सविप्फारिकतासङ्खातं असन्तसभावं आह. अवूपसमहेतुभूतोति विक्खेपहेतुभूतो. पीतिया आकारोति पीतिया पवत्तिआकारो.

पञ्चकनिद्देसवण्णना निट्ठिता.