२. सच्चवारादिवण्णना

७१९. कालत्तयेपीति अतीतादीसु तीसुपि कालेसु. हेतुफलधम्मा हेतूनं फलभूता धम्मा, पच्चयनिब्बत्ताति अत्थो. तेसञ्च हेतुधम्माति तेसं हेतुफलानं पच्चयनिब्बत्तानं हेतुभूता धम्मा ‘‘धम्मा’’ति वुत्ताति योजना. विनेय्यवसेनाति तथाविनेतब्बपुग्गलज्झासयवसेन. उप्पन्ना समुप्पन्नातिआदि न वुत्तन्ति उप्पन्ना समुप्पन्ना उट्ठिता समुट्ठिता पच्चुप्पन्नातिआदि न वुत्तं एकन्तपच्चुप्पन्नस्सेव सङ्गाहकत्ता. तंनिब्बत्तकाति तेसं अत्थभावेन वुत्तानं निप्फादका. धम्माति वुत्ता धम्मभावेन कथिता.

सच्चवारादिवण्णना निट्ठिता.

सुत्तन्तभाजनीयवण्णना निट्ठिता.