१. एककमातिकादिवण्णना

७५१. ओकासट्ठेन सम्पयुत्ता धम्मा आरम्मणञ्चापि ञाणस्स वत्थु. याथावकवत्थुविभावनाति नहेतादिअवितथेकप्पकारवत्थुविभावना. यथा एकं नहेतु, तथा एकं अञ्ञम्पीति हि गहेतब्बं अवितथसामञ्ञयुत्तं ञाणारम्मणं याथावकवत्थु. याथावकेन वा अवितथसामञ्ञेन वत्थुविभावना याथावकवत्थुविभावना.

दुकानुरूपेहीति दुकमातिकानुरूपेहीति वदन्ति. ओसानदुकस्स पन दुकमातिकं अनिस्साय वुत्तत्ता दुकभावानुरूपेहीति वत्तब्बं. एवं तिकानुरूपेहीति एत्थापि दट्ठब्बं. ओसानदुके पन अत्थोति फलं, अनेकत्थत्ता धातुसद्दानं तं जनेतीति अत्थजापिका, कारणगता पञ्ञा. जापितो जनितो अत्थो एतिस्साति जापितत्था, कारणपञ्ञासदिसी फलप्पकासनभूता फलसम्पयुत्ता पञ्ञा.