९. नन्दसुत्तवण्णना

९. नवमे दुविधा कुलपुत्ता जातिकुलपुत्ता आचारकुलपुत्ता च. तत्थ ‘‘तेन खो पन समयेन रट्ठपालो कुलपुत्तो तस्मिंयेव थुल्लकोट्ठिके अग्गकुलिकस्स पुत्तो’’ति (म. नि. २.२९४) एवं आगता उच्चाकुलपुत्ता जातिकुलपुत्ता. ‘‘सद्धायेते कुलपुत्ता अगारस्मा अनगारियं पब्बजिता’’ति (म. नि. ३.७८) एवं आगता पन यत्थ कत्थचि कुले पसुतापि आचारकुलपुत्ता नाम. इध पन उच्चाकुलप्पसुततं सन्धाय ‘‘कुलपुत्तोति, भिक्खवे, नन्दं सम्मा वदमानो वदेय्या’’ति भगवता वुत्तन्ति आह ‘‘जातिकुलपुत्तो’’ति. उभोहिपि पन कारणेहि तस्स कुलपुत्तभावोयेव. सेसमेत्थ उत्तानमेव.

नन्दसुत्तवण्णना निट्ठिता.