५. पठमलोकधम्मसुत्तवण्णना

५. पञ्चमे लोकस्स धम्माति सत्तलोकस्स अवस्संभाविधम्मा. तेनाह ‘‘एतेहि मुत्ता नाम नत्थि’’तिआदि. घासच्छादनादीनं लद्धि लाभो, तानि एव वा लद्धब्बतो लाभो, तदभावो अलाभो, लाभग्गहणेन चेत्थ तब्बिसयो अनुरोधो गहितो, अलाभग्गहणेन विरोधो. यस्मा लोहिते सति तदुपघातवसेन पुब्बो विय अनुरोधो लद्धावसरो एव होति, तस्मा वुत्तं ‘‘लाभे आगते अलाभो आगतोयेवा’’ति. एस नयो यसादीसुपि. सेसं सुविञ्ञेय्यमेव.

पठमलोकधम्मसुत्तवण्णना निट्ठिता.