१०. तथसुत्तं

१०९०. ‘‘चत्तारिमानि, भिक्खवे, तथानि अवितथानि अनञ्ञथानि. कतमानि चत्तारि? ‘इदं दुक्ख’न्ति, भिक्खवे, तथमेतं अवितथमेतं अनञ्ञथमेतं; ‘अयं दुक्खसमुदयो’ति तथमेतं अवितथमेतं अनञ्ञथमेतं; ‘अयं दुक्खनिरोधो’ति तथमेतं अवितथमेतं अनञ्ञथमेतं; ‘अयं दुक्खनिरोधगामिनी पटिपदा’ति तथमेतं अवितथमेतं अनञ्ञथमेतं – इमानि खो, भिक्खवे, चत्तारि तथानि अवितथानि अनञ्ञथानि.

‘‘तस्मातिह, भिक्खवे, ‘इदं दुक्ख’न्ति योगो करणीयो…पे… ‘अयं दुक्खनिरोधगामिनी पटिपदा’ति योगो करणीयो’’ति. दसमं.

धम्मचक्कप्पवत्तनवग्गो दुतियो.

तस्सुद्दानं –

धम्मचक्कं तथागतं, खन्धा आयतनेन च;

धारणा च द्वे अविज्जा, विज्जा सङ्कासना तथाति.