१४. कुक्कुळवग्गो

१. कुक्कुळसुत्तं

१३६. सावत्थिनिदानं. ‘‘रूपं, भिक्खवे, कुक्कुळं, वेदना कुक्कुळा, सञ्ञा कुक्कुळा, सङ्खारा कुक्कुळा, विञ्ञाणं कुक्कुळं. एवं पस्सं, भिक्खवे, सुतवा अरियसावको रूपस्मिम्पि निब्बिन्दति, वेदनायपि निब्बिन्दति, सञ्ञायपि निब्बिन्दति, सङ्खारेसुपि निब्बिन्दति, विञ्ञाणस्मिम्पि निब्बिन्दति. निब्बिन्दं विरज्जति; विरागा विमुच्चति. विमुत्तस्मिं विमुत्तमिति ञाणं होति. ‘खीणा जाति, वुसितं ब्रह्मचरियं, कतं करणीयं, नापरं इत्थत्ताया’ति पजानाती’’ति. पठमं.

२. अनिच्चसुत्तं

१३७. सावत्थिनिदानं. ‘‘यं, भिक्खवे, अनिच्चं; तत्र वो छन्दो पहातब्बो. किञ्च, भिक्खवे, अनिच्चं? रूपं, भिक्खवे, अनिच्चं; तत्र वो छन्दो पहातब्बो. वेदना अनिच्चा…पे… सञ्ञा… सङ्खारा… विञ्ञाणं अनिच्चं; तत्र वो छन्दो पहातब्बो. यं, भिक्खवे, अनिच्चं; तत्र वो छन्दो पहातब्बो’’ति. दुतियं.

३. दुतियअनिच्चसुत्तं

१३८. सावत्थिनिदानं. ‘‘यं, भिक्खवे, अनिच्चं; तत्र वो रागो पहातब्बो. किञ्च, भिक्खवे, अनिच्चं? रूपं, भिक्खवे, अनिच्चं; तत्र वो रागो पहातब्बो. वेदना अनिच्चा… सञ्ञा… सङ्खारा… विञ्ञाणं अनिच्चं; तत्र वो रागो पहातब्बो. यं, भिक्खवे, अनिच्चं; तत्र वो रागो पहातब्बो’’ति. ततियं.

४. ततियअनिच्चसुत्तं

१३९. सावत्थिनिदानं. ‘‘यं, भिक्खवे, अनिच्चं; तत्र वो छन्दरागो पहातब्बो. किञ्च, भिक्खवे, अनिच्चं? रूपं, भिक्खवे, अनिच्चं, तत्र वो छन्दरागो पहातब्बो. वेदना अनिच्चा… सञ्ञा… सङ्खारा… विञ्ञाणं अनिच्चं; तत्र वो छन्दरागो पहातब्बो. यं, भिक्खवे, अनिच्चं; तत्र वो छन्दरागो पहातब्बो’’ति. चतुत्थं.

५. दुक्खसुत्तं

१४०. सावत्थिनिदानं. ‘‘यं, भिक्खवे, दुक्खं; तत्र वो छन्दो पहातब्बो…पे… यं, भिक्खवे, दुक्खं; तत्र वो छन्दो पहातब्बो’’ति. पञ्चमं.

६. दुतियदुक्खसुत्तं

१४१. सावत्थिनिदानं. ‘‘यं, भिक्खवे, दुक्खं; तत्र वो रागो पहातब्बो…पे… यं, भिक्खवे, दुक्खं; तत्र वो रागो पहातब्बो’’ति. छट्ठं.

७. ततियदुक्खसुत्तं

१४२. सावत्थिनिदानं. ‘‘यं, भिक्खवे, दुक्खं; तत्र वो छन्दरागो पहातब्बो…पे… यं, भिक्खवे, दुक्खं; तत्र वो छन्दरागो पहातब्बो’’ति. सत्तमं.

८. अनत्तसुत्तं

१४३. सावत्थिनिदानं. ‘‘यो, भिक्खवे, अनत्ता; तत्र वो छन्दो पहातब्बो. को च, भिक्खवे, अनत्ता? रूपं, भिक्खवे, अनत्ता; तत्र वो छन्दो पहातब्बो. वेदना अनत्ता… सञ्ञा… सङ्खारा… विञ्ञाणं अनत्ता; तत्र वो छन्दो पहातब्बो. यो, भिक्खवे, अनत्ता; तत्र वो छन्दो पहातब्बो’’ति. अट्ठमं.

९. दुतियअनत्तसुत्तं

१४४. सावत्थिनिदानं. ‘‘यो, भिक्खवे, अनत्ता; तत्र वो रागो पहातब्बो. को च, भिक्खवे, अनत्ता? रूपं, भिक्खवे, अनत्ता; तत्र वो रागो पहातब्बो. वेदना अनत्ता… सञ्ञा… सङ्खारा… विञ्ञाणं अनत्ता; तत्र वो रागो पहातब्बो. यो, भिक्खवे, अनत्ता; तत्र वो रागो पहातब्बो’’ति. नवमं.

१०. ततियअनत्तसुत्तं

१४५. सावत्थिनिदानं. ‘‘यो, भिक्खवे, अनत्ता; तत्र वो छन्दरागो पहातब्बो. को च, भिक्खवे, अनत्ता? रूपं, भिक्खवे, अनत्ता; तत्र वो छन्दरागो पहातब्बो. वेदना अनत्ता… सञ्ञा… सङ्खारा… विञ्ञाणं अनत्ता; तत्र वो छन्दरागो पहातब्बो. यो, भिक्खवे, अनत्ता; तत्र वो छन्दरागो पहातब्बो’’ति. दसमं.

११. निब्बिदाबहुलसुत्तं

१४६. सावत्थिनिदानं. ‘‘सद्धापब्बजितस्स, भिक्खवे, कुलपुत्तस्स अयमनुधम्मो होति – यं रूपे निब्बिदाबहुलो [निब्बिदाबहुलं (स्या. कं. पी. क.)] विहरेय्य. वेदनाय…पे… सञ्ञाय… सङ्खारेसु… विञ्ञाणे निब्बिदाबहुलो विहरेय्य. यो रूपे निब्बिदाबहुलो विहरन्तो, वेदनाय… सञ्ञाय… सङ्खारेसु… विञ्ञाणे निब्बिदाबहुलो विहरन्तो रूपं परिजानाति, वेदनं… सञ्ञं… सङ्खारे… विञ्ञाणं परिजानाति; सो रूपं परिजानं वेदनं परिजानं सञ्ञं परिजानं सङ्खारे परिजानं विञ्ञाणं परिजानं परिमुच्चति रूपम्हा, परिमुच्चति वेदनाय, परिमुच्चति सञ्ञाय, परिमुच्चति सङ्खारेहि, परिमुच्चति विञ्ञाणम्हा, परिमुच्चति जातिया जराय मरणेन सोकेहि परिदेवेहि दुक्खेहि दोमनस्सेहि उपायासेहि; ‘परिमुच्चति दुक्खस्मा’ति वदामी’’ति. एकादसमं.

१२. अनिच्चानुपस्सीसुत्तं

१४७. सावत्थिनिदानं. ‘‘सद्धापब्बजितस्स, भिक्खवे, कुलपुत्तस्स अयमनुधम्मो होति – यं रूपे अनिच्चानुपस्सी विहरेय्य. वेदनाय… सञ्ञाय… सङ्खारेसु… विञ्ञाणे अनिच्चानुपस्सी विहरेय्य…पे… ‘परिमुच्चति दुक्खस्मा’ति वदामी’’ति. द्वादसमं.

१३. दुक्खानुपस्सीसुत्तं

१४८. सावत्थिनिदानं. ‘‘सद्धापब्बजितस्स, भिक्खवे, कुलपुत्तस्स अयमनुधम्मो होति – यं रूपे दुक्खानुपस्सी विहरेय्य. वेदनाय… सञ्ञाय… सङ्खारेसु… विञ्ञाणे दुक्खानुपस्सी विहरेय्य…पे… ‘परिमुच्चति दुक्खस्मा’ति वदामी’’ति. तेरसमं.

१४. अनत्तानुपस्सीसुत्तं

१४९. सावत्थिनिदानं. ‘‘सद्धापब्बजितस्स, भिक्खवे, कुलपुत्तस्स अयमनुधम्मो होति – यं रूपे अनत्तानुपस्सी विहरेय्य. वेदनाय… सञ्ञाय… सङ्खारेसु… विञ्ञाणे अनत्तानुपस्सी विहरेय्य. (सो रूपे) अनत्तानुपस्सी विहरन्तो, वेदनाय… सञ्ञाय… सङ्खारेसु… विञ्ञाणे अनत्तानुपस्सी विहरन्तो रूपं परिजानाति, वेदनं…पे… सञ्ञं… सङ्खारे… विञ्ञाणं परिजानाति. सो रूपं परिजानं वेदनं परिजानं सञ्ञं परिजानं सङ्खारे परिजानं विञ्ञाणं परिजानं परिमुच्चति रूपम्हा, परिमुच्चति वेदनाय, परिमुच्चति सञ्ञाय, परिमुच्चति सङ्खारेहि, परिमुच्चति विञ्ञाणम्हा, परिमुच्चति जातिया जराय मरणेन सोकेहि परिदेवेहि दुक्खेहि दोमनस्सेहि उपायासेहि; ‘परिमुच्चति दुक्खस्मा’ति वदामी’’ति. चुद्दसमं.

कुक्कुळवग्गो चुद्दसमो.

तस्सुद्दानं –

कुक्कुळा तयो अनिच्चेन, दुक्खेन अपरे तयो;

अनत्तेन तयो वुत्ता, कुलपुत्तेन द्वे दुकाति.