३. सक्कायसुत्तं

१०५. सावत्थिनिदानं. ‘‘सक्कायञ्च वो, भिक्खवे, देसेस्सामि सक्कायसमुदयञ्च सक्कायनिरोधञ्च सक्कायनिरोधगामिनिञ्च पटिपदं. तं सुणाथ. कतमो च, भिक्खवे, सक्कायो? पञ्चुपादानक्खन्धातिस्स वचनीयं. कतमे पञ्च? सेय्यथिदं – रूपुपादानक्खन्धो, वेदनुपादानक्खन्धो, सञ्ञुपादानक्खन्धो, सङ्खारुपादानक्खन्धो, विञ्ञाणुपादानक्खन्धो. अयं वुच्चति, भिक्खवे, सक्कायो. कतमो च, भिक्खवे, सक्कायसमुदयो? यायं तण्हा पोनोभविका…पे… कामतण्हा, भवतण्हा, विभवतण्हा – अयं वुच्चति, भिक्खवे, सक्कायसमुदयो. कतमो च, भिक्खवे, सक्कायनिरोधो? यो तस्सायेव तण्हाय…पे… अयं वुच्चति, भिक्खवे, सक्कायनिरोधो. कतमा च, भिक्खवे, सक्कायनिरोधगामिनी पटिपदा? अयमेव अरियो अट्ठङ्गिको मग्गो. सेय्यथिदं – सम्मादिट्ठि…पे… सम्मासमाधि. अयं वुच्चति, भिक्खवे, सक्कायनिरोधगामिनी पटिपदा’’ति. ततियं.