१०. दुतियछन्दप्पहानसुत्तं

११२. सावत्थिनिदानं. ‘‘रूपे, भिक्खवे, यो छन्दो यो रागो या नन्दी या तण्हा ये उपयुपादाना चेतसो अधिट्ठानाभिनिवेसानुसया, ते पजहथ. एवं तं रूपं पहीनं भविस्सति उच्छिन्नमूलं…पे… वेदनाय… सञ्ञाय… सङ्खारेसु यो छन्दो…पे… एवं ते सङ्खारा पहीना भविस्सन्ति उच्छिन्नमूला तालावत्थुकता अनभावंकता आयतिं अनुप्पादधम्मा. विञ्ञाणे यो छन्दो यो रागो या नन्दी या तण्हा ये उपयुपादाना चेतसो अधिट्ठानाभिनिवेसानुसया, ते पजहथ. एवं तं विञ्ञाणं पहीनं भविस्सति उच्छिन्नमूलं तालावत्थुकतं अनभावंकतं आयतिं अनुप्पादधम्म’’न्ति. दसमं.

अन्तवग्गो एकादसमो.

तस्सुद्दानं –

अन्तो दुक्खञ्च सक्कायो, परिञ्ञेय्या समणा दुवे;

सोतापन्नो अरहा च, दुवे च छन्दप्पहानाति.