८. नामरूपसुत्तं

५८. सावत्थियं विहरति…पे… ‘‘संयोजनियेसु, भिक्खवे, धम्मेसु अस्सादानुपस्सिनो विहरतो नामरूपस्स अवक्कन्ति होति. नामरूपपच्चया सळायतनं…पे… एवमेतस्स केवलस्स दुक्खक्खन्धस्स समुदयो होति’’.

‘‘सेय्यथापि, भिक्खवे, महारुक्खो. तस्स यानि चेव मूलानि अधोगमानि, यानि च तिरियङ्गमानि, सब्बानि तानि उद्धं ओजं अभिहरन्ति. एवञ्हि सो, भिक्खवे, महारुक्खो तदाहारो तदुपादानो चिरं दीघमद्धानं तिट्ठेय्य. एवमेव खो, भिक्खवे, संयोजनियेसु धम्मेसु अस्सादानुपस्सिनो विहरतो नामरूपस्स अवक्कन्ति होति…पे….

‘‘संयोजनियेसु, भिक्खवे, धम्मेसु आदीनवानुपस्सिनो विहरतो नामरूपस्स अवक्कन्ति न होति. नामरूपनिरोधा सळायतननिरोधो…पे… एवमेतस्स केवलस्स दुक्खक्खन्धस्स निरोधो होति.

‘‘सेय्यथापि, भिक्खवे, महारुक्खो. अथ पुरिसो आगच्छेय्य कुद्दालपिटकं आदाय…पे… आयतिं अनुप्पादधम्मो. एवमेव खो, भिक्खवे, संयोजनियेसु धम्मेसु आदीनवानुपस्सिनो विहरतो नामरूपस्स अवक्कन्ति न होति. नामरूपनिरोधा सळायतननिरोधो…पे… एवमेतस्स केवलस्स दुक्खक्खन्धस्स निरोधो होती’’ति. अट्ठमं.