६. एकपिण्डपातदायिकाथेरीअपदानं

४६. ‘‘नगरे बन्धुमतिया, बन्धुमा नाम खत्तियो;

तस्स रञ्ञो अहुं भरिया, एकज्झं चारयामहं [एकच्चं वादयामहं (स्या.)].

४७. ‘‘रहोगता निसीदित्वा, एवं चिन्तेसहं तदा;

‘आदाय गमनीयञ्हि, कुसलं नत्थि मे कतं.

४८. ‘‘‘महाभितापं कटुकं, घोररूपं सुदारुणं;

निरयं नून गच्छामि, एत्थ मे नत्थि संसयो’.

४९. ‘‘राजानं उपसङ्कम्म, इदं वचनमब्रविं;

‘एकं मे समणं देहि, भोजयिस्सामि खत्तिय’.

५०. ‘‘अदासि मे महाराजा, समणं भावितिन्द्रियं;

तस्स पत्तं गहेत्वान, परमन्नेन पूरयिं [तप्पयिं (सी.)].

५१. ‘‘पूरयित्वा परमन्नं, गन्धालेपं अकासहं;

जालेन पिदहित्वान, वत्थयुगेन [पीतचोळेन (स्या.), महानेलेन (पी.)] छादयिं.

५२. ‘‘आरम्मणं ममं एतं, सरामि यावजीविहं;

तत्थ चित्तं पसादेत्वा, तावतिंसमगच्छहं.

५३. ‘‘तिंसानं देवराजूनं, महेसित्तमकारयिं;

मनसा पत्थितं मय्हं, निब्बत्तति यथिच्छितं [यतिच्छकं (स्या.), यदिच्छकं (पी. क.)].

५४. ‘‘वीसानं चक्कवत्तीनं, महेसित्तमकारयिं;

ओचितत्ताव [उपचितत्ता (स्या.)] हुत्वान, संसरामि भवेस्वहं.

५५. ‘‘सब्बबन्धनमुत्ताहं, अपेता मे उपादिका;

सब्बासवपरिक्खीणा, नत्थि दानि पुनब्भवो.

५६. ‘‘एकनवुतितो कप्पे, यं दानमददिं तदा;

दुग्गतिं नाभिजानामि, पिण्डपातस्सिदं फलं.

५७. ‘‘किलेसा झापिता मय्हं…पे… विहरामि अनासवा.

५८. ‘‘स्वागतं वत मे आसि…पे… कतं बुद्धस्स सासनं.

५९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं एकपिण्डपातदायिका भिक्खुनी इमा गाथायो अभासित्थाति.

एकपिण्डपातदायिकाथेरियापदानं छट्ठं.