४. सङ्कमनत्थाथेरीअपदानं

३१. ‘‘विपस्सिस्स भगवतो [कोण्डञ्ञस्स भगवतो (स्या. पी.)], लोकजेट्ठस्स तादिनो;

रथियं पटिपन्नस्स, तारयन्तस्स पाणिनो.

३२. ‘‘घरतो निक्खमित्वान, अवकुज्जा निपज्जहं;

अनुकम्पको लोकनाथो, सिरसि [सीसन्ते (सी. क.)] अक्कमी मम [तदा (स्या. पी.)].

३३. ‘‘अक्कमित्वान सिरसि [सम्बुद्धो (क.)], अगमा लोकनायको;

तेन चित्तप्पसादेन, तुसितं अगमासहं.

३४. ‘‘किलेसा झापिता मय्हं…पे… विहरामि अनासवा.

३५. ‘‘स्वागतं वत मे आसि…पे… कतं बुद्धस्स सासनं.

३६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं सङ्कमनत्था [सङ्कमनदा (स्या.)] भिक्खुनी इमा गाथायो अभासित्थाति.

सङ्कमनत्थाथेरियापदानं चतुत्थं.