३५. परिनिब्बानञाणनिद्देसो

८६. कथं सम्पजानस्स पवत्तपरियादाने पञ्ञा परिनिब्बाने ञाणं? इध सम्पजानो नेक्खम्मेन कामच्छन्दस्स पवत्तं परियादियति, अब्यापादेन ब्यापादस्स पवत्तं परियादियति, आलोकसञ्ञाय थिनमिद्धस्स पवत्तं परियादियति, अविक्खेपेन उद्धच्चस्स पवत्तं परियादियति, धम्मववत्थानेन विचिकिच्छाय…पे… ञाणेन अविज्जाय… पामोज्जेन अरतिया … पठमेन झानेन नीवरणानं पवत्तं परियादियति…पे… अरहत्तमग्गेन सब्बकिलेसानं पवत्तं परियादियति.

अथ वा पन सम्पजानस्स अनुपादिसेसाय निब्बानधातुया परिनिब्बायन्तस्स इदञ्चेव चक्खुपवत्तं परियादियति, अञ्ञञ्च चक्खुपवत्तं न उप्पज्जति. इदञ्चेव सोतपवत्तं…पे… घानपवत्तं… जिव्हापवत्तं… कायपवत्तं… मनोपवत्तं परियादियति, अञ्ञञ्च मनोपवत्तं न उप्पज्जति. इदं सम्पजानस्स पवत्तपरियादाने पञ्ञा परिनिब्बाने ञाणं. तं ञातट्ठेन ञाणं, पजाननट्ठेन पञ्ञा. तेन वुच्चति – ‘‘सम्पजानस्स पवत्तपरियादाने पञ्ञा परिनिब्बाने ञाणं’’.

परिनिब्बानञाणनिद्देसो पञ्चतिंसतिमो.