३. निपन्नञ्जलिकत्थेरअपदानं

१६. ‘‘रुक्खमूले निसिन्नोहं, ब्याधितो परमेन च;

परमकारुञ्ञपत्तोम्हि, अरञ्ञे कानने अहं.

१७. ‘‘अनुकम्पं उपादाय, तिस्सो सत्था उपेसि मं;

सोहं निपन्नको सन्तो, सिरे कत्वान अञ्जलिं.

१८. ‘‘पसन्नचित्तो सुमनो, सब्बसत्तानमुत्तमं;

सम्बुद्धं अभिवादेत्वा, तत्थ कालङ्कतो अहं.

१९. ‘‘द्वेनवुते इतो कप्पे, यं वन्दिं पुरिसुत्तमं;

दुग्गतिं नाभिजानामि, वन्दनाय इदं फलं.

२०. ‘‘इतो पञ्चमके कप्पे, पञ्चेवासुं महासिखा;

सत्तरतनसम्पन्ना, चक्कवत्ती महब्बला.

२१. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा निपन्नञ्जलिको थेरो इमा गाथायो अभासित्थाति.

निपन्नञ्जलिकत्थेरस्सापदानं ततियं.