२. अवोपुप्फियत्थेरअपदानं

७. ‘‘विहारा अभिनिक्खम्म, अब्भुट्ठहिय [अब्भुट्ठासि च (स्या. क.)] चङ्कमे;

चतुसच्चं पकासन्तो, देसेति [देसेन्तो (स्या. क.)] अमतं पदं.

८. ‘‘सिखिस्स गिरमञ्ञाय, बुद्धसेट्ठस्स तादिनो;

नानापुप्फं गहेत्वान, आकासम्हि समोकिरिं.

९. ‘‘तेन कम्मेन द्विपदिन्द, लोकजेट्ठ नरासभ;

पत्तोम्हि अचलं ठानं, हित्वा जयपराजयं.

१०. ‘‘एकत्तिंसे इतो कप्पे, यं पुप्फमभिरोपयिं;

दुग्गतिं नाभिजानामि, पुप्फपूजायिदं फलं.

११. ‘‘इतो वीसतिकप्पम्हि, सुमेधो नाम खत्तियो;

सत्तरतनसम्पन्नो, चक्कवत्ती महब्बलो.

१२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अवोपुप्फियो थेरो इमा गाथायो अभासित्थाति.

अवोपुप्फियत्थेरस्सापदानं दुतियं.