१. नळमालियत्थेरअपदानं

१. ‘‘सुवण्णवण्णं सम्बुद्धं, आहुतीनं पटिग्गहं;

विपिनग्गेन गच्छन्तं, अद्दसं लोकनायकं.

२. ‘‘नळमालं गहेत्वान, निक्खमन्तो च तावदे;

तत्थद्दसासिं सम्बुद्धं, ओघतिण्णमनासवं.

३. ‘‘पसन्नचित्तो सुमनो, नळमालमपूजयिं;

दक्खिणेय्यं महावीरं, सब्बलोकानुकम्पकं.

४. ‘‘एकतिंसे इतो कप्पे, यं मालमभिरोपयिं [पुप्फमभिरोपयिं (सी. स्या. पी.)];

दुग्गतिं नाभिजानामि, बुद्धपूजायिदं फलं.

५. ‘‘किलेसा झापिता मय्हं, भवा सब्बे समूहता;

नागोव बन्धनं छेत्वा, विहरामि अनासवो.

६. ‘‘स्वागतं वत मे आसि, मम बुद्धस्स सन्तिके;

तिस्सो विज्जा अनुप्पत्ता, कतं बुद्धस्स सासनं.

७. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा नळमालियो थेरो इमा गाथायो

अभासित्थाति.

नळमालियत्थेरस्सापदानं पठमं.