९. अम्बपिण्डियत्थेरअपदानं

७२. ‘‘हत्थिराजा तदा आसिं, ईसादन्तो उरुळ्हवा;

विचरन्तो ब्रहारञ्ञे, अद्दसं लोकनायकं.

७३. ‘‘अम्बपिण्डं गहेत्वान, अदासिं सत्थुनो अहं;

पटिग्गण्हि महावीरो, सिद्धत्थो लोकनायको.

७४. ‘‘मम निज्झायमानस्स, परिभुञ्जि तदा जिनो;

तत्थ चित्तं पसादेत्वा, तुसितं उपपज्जहं.

७५. ‘‘ततो अहं चवित्वान, चक्कवत्ती अहोसहं;

एतेनेव उपायेन, अनुभुत्वान सम्पदा.

७६. ‘‘पधानपहितत्तोहं, उपसन्तो निरूपधि;

सब्बासवे परिञ्ञाय, विहरामि अनासवो.

७७. ‘‘चतुन्नवुतितो कप्पे, यं फलमददिं तदा;

दुग्गतिं नाभिजानामि, फलदानस्सिदं फलं.

७८. ‘‘किलेसा झापिता मय्हं…पे… विहरामि अनासवो.

७९. ‘‘स्वागतं वत मे आसि…पे… कतं बुद्धस्स सासनं.

८०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अम्बपिण्डियो थेरो इमा गाथायो

अभासित्थाति.

अम्बपिण्डियत्थेरस्सापदानं नवमं.