४. पट्टिपुप्फियत्थेरअपदानं

२२. ‘‘यदा निब्बायि सम्बुद्धो, महेसी पदुमुत्तरो;

समागम्म जना सब्बे, सरीरं नीहरन्ति ते.

२३. ‘‘नीहरन्ते सरीरम्हि, वज्जमानासु भेरिसु;

पसन्नचित्तो सुमनो, पट्टिपुप्फं अपूजयिं.

२४. ‘‘सतसहस्सितो कप्पे, यं पुप्फमभिपूजयिं;

दुग्गतिं नाभिजानामि, सरीरपूजिते फलं.

२५. ‘‘किलेसा झापिता मय्हं, भवा सब्बे समूहता;

नागोव बन्धनं छेत्वा, विहरामि अनासवो.

२६. ‘‘स्वागतं वत मे आसि, मम बुद्धस्स [बुद्धसेट्ठस्स (सी.)] सन्तिके;

तिस्सो विज्जा अनुप्पत्ता, कतं बुद्धस्स सासनं.

२७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा पट्टिपुप्फियो थेरो इमा गाथायो अभासित्थाति.

पट्टिपुप्फियत्थेरस्सापदानं चतुत्थं.