५. नळागारिकत्थेरअपदानं

३१. ‘‘हिमवन्तस्साविदूरे, हारितो नाम पब्बतो;

सयम्भू नारदो नाम, रुक्खमूले वसी तदा.

३२. ‘‘नळागारं करित्वान, तिणेन छादयिं अहं;

चङ्कमं सोधयित्वान, सयम्भुस्स अदासहं.

३३. ‘‘चतुद्दससु कप्पेसु, देवलोके रमिं अहं;

चतुसत्ततिक्खत्तुञ्च, देवरज्जं अकारयिं.

३४. ‘‘चतुसत्तति [सत्तसत्तति (सी.)] क्खत्तुञ्च, चक्कवत्ती अहोसहं;

पदेसरज्जं विपुलं, गणनातो असङ्खियं.

३५. ‘‘उब्बिद्धं भवनं मय्हं, इन्दलट्ठीव उग्गतं;

सहस्सथम्भं अतुलं, विमानं सपभस्सरं.

३६. ‘‘द्वे सम्पत्ती अनुभोत्वा, सुक्कमूलेन चोदितो;

गोतमस्स भगवतो, सासने पब्बजिं अहं.

३७. ‘‘पधानपहितत्तोम्हि, उपसन्तो निरूपधि;

नागोव बन्धनं छेत्वा, विहरामि अनासवो.

३८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा नळागारिको थेरो इमा गाथायो अभासित्थाति.

नळागारिकत्थेरस्सापदानं पञ्चमं.