८. सरणगमनियत्थेरअपदानं

३६. ‘‘पब्बते हिमवन्तम्हि, अहोसिं लुद्दको तदा;

विपस्सिं अद्दसं बुद्धं, लोकजेट्ठं नरासभं.

३७. ‘‘उपासित्वान सम्बुद्धं, वेय्यावच्चमकासहं;

सरणञ्च उपागच्छिं, द्विपदिन्दस्स तादिनो.

३८. ‘‘एकनवुतितो कप्पे, सरणं उपगच्छहं;

दुग्गतिं नाभिजानामि, सरणागमनप्फलं.

३९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सरणगमनियो थेरो इमा गाथायो अभासित्थाति.

सरणगमनियत्थेरस्सापदानं अट्ठमं.