८. आलुवदायकत्थेरअपदानं

३१. ‘‘पब्बते हिमवन्तम्हि, महासिन्धु सुदस्सना;

तत्थद्दसं वीतरागं, सुप्पभासं सुदस्सनं.

३२. ‘‘परमोपसमे युत्तं, दिस्वा विम्हितमानसो;

आलुवं तस्स पादासिं, पसन्नो सेहि पाणिभि.

३३. ‘‘एकत्तिंसे इतो कप्पे, यं फलमददिं तदा;

दुग्गतिं नाभिजानामि, आलुवस्स इदं फलं.

३४. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा आलुवदायको थेरो इमा गाथायो अभासित्थाति.

आलुवदायकत्थेरस्सापदानं अट्ठमं.