५. बिळालिदायकत्थेरअपदानं

१८. ‘‘हिमवन्तस्साविदूरे, रोमसो नाम पब्बतो;

तम्हि पब्बतपादम्हि, समणो भावितिन्द्रियो.

१९. ‘‘बिळालियो गहेत्वान, समणस्स अदासहं;

अनुमोदि महावीरो, सयम्भू अपराजितो.

२०. ‘‘बिळाली ते मम दिन्ना, विप्पसन्नेन चेतसा;

भवे निब्बत्तमानम्हि, फलं निब्बत्ततं तव.

२१. ‘‘चतुन्नवुतितो कप्पे, यं बिळालिमदासहं;

दुग्गतिं नाभिजानामि, बिळालिया इदं फलं.

२२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा बिळालिदायको थेरो इमा गाथायो अभासित्थाति.

बिळालिदायकत्थेरस्सापदानं पञ्चमं.