३. नळिनकेसरियत्थेरअपदानं

९. ‘‘जातस्सरस्स वेमज्झे, वसामि जलकुक्कुटो;

अद्दसाहं [अथद्दसं (सी. स्या.)] देवदेवं, गच्छन्तं अनिलञ्जसे.

१०. ‘‘तुण्डेन केसरिं [केसरं (स्या.)] गय्ह, विप्पसन्नेन चेतसा;

बुद्धस्स अभिरोपेसिं, तिस्सस्स लोकबन्धुनो.

११. ‘‘द्वेनवुते इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

१२. ‘‘तेसत्ततिम्हि कप्पम्हि, सत्त केसरनामका [सतपत्तसनामको (सी. स्या.)];

सत्तरतनसम्पन्ना, चक्कवत्ती महब्बला.

१३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा नळिनकेसरियो थेरो इमा गाथायो अभासित्थाति.

नळिनकेसरियत्थेरस्सापदानं ततियं.