३. सालपुप्फियत्थेरअपदानं

९. ‘‘अरुणवतिया नगरे, अहोसिं पूपिको तदा;

मम द्वारेन गच्छन्तं, सिखिनं अद्दसं जिनं.

१०. ‘‘बुद्धस्स पत्तं पग्गय्ह, सालपुप्फं अदासहं;

सम्मग्गतस्स बुद्धस्स, विप्पसन्नेन चेतसा.

११. ‘‘एकत्तिंसे इतो कप्पे, यं पुप्फमभिदासहं [यं खज्जकमदासहं (सी.), यं खज्जमभिदासहं (क.) सालपुप्फनामकं खज्जकं वा भवेय्य];

दुग्गतिं नाभिजानामि, सालपुप्फस्सिदं फलं.

१२. ‘‘इतो चुद्दसकप्पम्हि, अहोसिं अमितञ्जलो;

सत्तरतनसम्पन्नो, चक्कवत्ती महब्बलो.

१३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सालपुप्फियो थेरो इमा गाथायो अभासित्थाति.

सालपुप्फियत्थेरस्सापदानं ततियं.