१. उदकासनदायकत्थेरअपदानं

१. ‘‘आरामद्वारा निक्खम्म, फलकं सन्थरिं अहं;

उदकञ्च उपट्ठासिं, उत्तमत्थस्स पत्तिया.

२. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, आसने चोदके फलं.

३. ‘‘इतो पन्नरसे कप्पे, अभिसामसमव्हयो;

सत्तरतनसम्पन्नो, चक्कवत्ती महब्बलो.

४. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा उदकासनदायको थेरो इमा गाथायो अभासित्थाति.

उदकासनदायकत्थेरस्सापदानं पठमं.