९. सप्पिदायकत्थेरअपदानं

४४. ‘‘निसिन्नो पासादवरे, नारीगणपुरक्खतो;

ब्याधितं समणं दिस्वा, अभिनामेसहं घरं.

४५. ‘‘उपविट्ठं महावीरं, देवदेवं नरासभं;

सप्पितेलं मया दिन्नं, सिद्धत्थस्स महेसिनो.

४६. ‘‘पस्सद्धदरथं दिस्वा, विप्पसन्नमुखिन्द्रियं;

वन्दित्वा सत्थुनो पादे, अनुसंसावयिं पुरे.

४७. ‘‘दिस्वा मं सुप्पसन्नत्तं [सुप्पसन्नन्तं (स्या. क.) सुप्पसन्नचित्तन्ति अत्थो], इद्धिया पारमिङ्गतो;

नभं अब्भुग्गमी धीरो, हंसराजाव अम्बरे.

४८. ‘‘चतुन्नवुतितो कप्पे, यं दानमददिं तदा;

दुग्गतिं नाभिजानामि, सप्पितेलस्सिदं फलं.

४९. ‘‘इतो सत्तरसे कप्पे, जुतिदेव [दुतिदेव (स्या.), तुतिदेव (क.)] सनामको;

सत्तरतनसम्पन्नो, चक्कवत्ती महब्बलो.

५०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सप्पिदायको थेरो इमा गाथायो अभासित्थाति.

सप्पिदायकत्थेरस्सापदानं नवमं.